Autoritetet turke i kanë konfirmuar tri raste të reja të personave të infektuar me koronavirus, duke e çuar në pesë numrin e përgjithshëm të njerëzve të infektuar.

“Pas dy rasteve të para, i kemi konfirmuar tri raste të reja. Këta tre persona kanë pasur kontakte me dy të infektuarit e parë, sepse ishin nga e njëjta familje. Të gjitha pesë rastet janë drejtpërdrejt të lidhura me njëra-tjetrën”, tha ministri turk i shëndetësisë, Fahrettin Koca.

Turqia i ka ndërprerë fluturimet me 14 shtete si pjesë e masave për luftimin e përhapjes së koronavirusit, shkruan “Anadolu”, transmeton Gazeta Express.

Ministri i shëndetësisë tha se qytetarët turq që kthehen nga vendet e huaja do të jenë të detyruar që t’i marrin dy javë pushim nga puna dhe të vetizolohen. Kjo masë do hyjë në fuqi ditën e hënë.

Përpos tyre, pushim duhet të marrin gratë shtatzëna, personat me nevoja të veçanta dhe personat mbi moshën 60-vjeçare. Ata duhet të qëndrojnë të izoluar në shtëpi pasi t’i marrin 12 ditë pushim, tha ministri Koca.

Autoritetet turke tashmë i kanë ndërprerë fluturimet me Kinën, Iranin, Irakun, Italinë, Korenë Jugore, Francën, Gjermaninë, Spanjën, Norvegjinë, Danimarkën, Belgjikën, Austrinë, Suedinë dhe Holandën.